Хүний генийг хувилах буюу генетикийн ижил хуулбарыг бүтээх ажиллагааны талаарх хууль зүйн зохицуулалт

Товчлол: Хүний генийн хувилах буюу генетикийн ижил хувилбар бүтээх инженерчлэлийн үйл ажиллагааг зохицуулсан хууль тогтоомжууд нь соёл, шашин шүтлэг, үр хөврөлийн төлөв байдлын талаарх нийгэмд давамгайлж буй үзэл санаанаас хамаарч улс орон бүрт харилцан адилгүй байдаг. Уг асуудал нь шинэ зүйл учир түүнээс үүдэн гарах эрсдэлийг тооцоолох боломж хомс юм. Иймд зарим улс орны хувьд хууль зүйн хязгаарлалт тогтоож байгаа бөгөөд зөвхөн судалгааны хүрээнд зөвшөөрч байна. Нэгдсэн Үндэсний Байгууллагын Боловсрол, Шинжлэх ухаан, Соёлын Байгууллага 1997 онд Хүний геном ба хүний эрхийн түгээмэл тунхаглалыг баталсан. Уг тунхаглал нь заавал дагаж мөрдөх албагүй баримт бичиг боловч гишүүн орнуудыг дагаж мөрдөхийг уриалсан байна. Тус тунхаглалд судалгаа, шинжилгээ, оншилгоо хийх эрх чөлөөг нээлттэй үлдээсэн. Цөөн улс орнуудын хувьд үр хөврөл, үүдэл эдийн эсийг импортлох, экспортлоход тусгай зөвшөөрөл олгож байгаа бол зарим улсад шууд хориглодог. Олон улсад хүний эрүүл мэнд, сайн сайхны төлөө генийн инженерчлэлийг зөвшөөрөх эсэх нь эргэлзээтэй үлдэж байна.