Гэрээний тусгай нөхцөл

Үндсэн тохиролцоо
1.1. Компани нь өөрийн хөгжүүлсэн Esan цахим сангаар дамжуулан Нийлүүлэгчийн өмчлөл, эзэмшилд байдаг, эсхүл энэхүү гэрээний дагуу шилжүүлэн авсан оюуны бүтээлүүдийг борлуулах (үүнд: худалдах, түрээслэх, нийтэд дэлгэж үзүүлэх зэрэг хамаарна)- эсвэл бусад хэлбэрээр уншигчдад хүргэнэ;
1.2. Компани нь гэрээний 1.1-т заасан хэлбэрээр борлуулсан Нийлүүлэгчийн бүтээлүүдэд хамаарах орлогоос Нийлүүлэгчид тохирсон хувь хэмжээгээр шилжүүлнэ;
1.3. Гэрээг талууд нийлүүлэгчийн бүтээл Esan цахим санд байршиж байгаа бүхий л хугацааны туршид дагаж мөрдөнө;
Esan цахим санд байрших контент, түүний үнэ
2.1. Нийлүүлэгч нь дараах 3 хэлбэрээр контентыг байршуулна: Үүнд:
2.1.1. Гишүүнчлэлийн контент - Цахим сангийн сарын гишүүнчлэлийн төлбөрийг төлсөн хувь хүн, хуулийн этгээд гишүүнчлэлийн хугацаанд түрээслэн унших боломжтой контент;
2.1.2. Төлбөртэй контент - Цахим санд бүртгэлтэй хэрэглэгч Нийлүүлэгчийн тогтоосон үнээр худалдан авч унших боломжтой дан контент;
2.1.3. Төлбөртэй аудио контент- Цахим санд бүртгэлтэй хэрэглэгч Нийлүүлэгчийн Контентийг Компанийн хөгжүүлсэн хиймэл оюун ухаан (AI)-д суурилсан аудио уншигчаар уншуулан сонсох боломжтой контент;
2.2. Гэрээний 2 дугаар зүйлийн 2.1.1-д заасан "Гишүүнчлэл"-ийн эрхээр хандах контентийг хувь хүн, хуулийн этгээд гишүүнчлэлийн хугацаанд түрээслэн үзэх бөгөөд цахим сан гишүүнчлэлийн төлбөртэй байна. Энэхүү үнэд НӨАТ багтсан болно;
2.3. Нийлүүлэгч нь Төлбөртэй контентод байрших Контентийн үнийг энэ Гэрээний Хавсралт 1 "Контент хүлээлцэх акт"-нд тусгана. Нийлүүлэгч нь энэ Гэрээний хугацаанд Гэрээний Хавсралт 1-т тэмдэглэл хийн, Талууд гарын үсэг зуран нэмэлтээр контент нийлүүлнэ;
2.4. Компани нь Нийлүүлэгчийн контентийг хиймэл оюун ухаанд суурилуулан аудио хэлбэрт хөрвүүлэх системийг хөгжүүлсэн бөгөөд Цахим санд байршсан Нийлүүлэгчийн Контентийг аудио хэлбэрээр худалдах үнэ нь Контентийн худалдах үнийг 20%-аар нэмэгдүүлсэн үнэ байна;
Төлбөр тооцоо
3.1. Esan цахим санд байршсан Контентийн орлогыг дараах хувь хэмжээгээр хуваарилахаар Талууд харилцан тохиролцов. Үүнд:
3.1.1. "Гишүүнчлэл" контентийг үзсэн, сонссон тохиолдолд ногдох нийт орлогын 30 /гуч/ хувийг Нийлүүлэгч, 70 /дал/ хувийг Компани;
3.1.2. "Төлбөр"-тэй /дан/ контент борлуулсан нийт орлогын 70 /дал/ хувийг Нийлүүлэгч, 30 /гуч/ хувийг Компани;
3.2. "Төлбөртэй AI аудио контент" /Төлбөртэй контент + 20%/ борлуулсан нийт орлогын нэмэлт 20% нь Компанид, Контентийн үндсэн худалдан борлуулах үнийн 70 хувийг Нийлүүлэгч, 30 хувийг Компани;
3.3. Нийлүүлэгч Контентийг өмчлөх, эзэмших эрхийг аливаа этгээдтэй хамтран эзэмшдэг бол хамтран эзэмшигчид оногдох төлбөрийг өөрт ногдох орлогоос дангаар хариуцан төлнө;
3.4. Нийлүүлэгчид ногдох контентийн нийт орлого 50,000 /тавин мянга/ төгрөгөөс дээш болсон тохиолдолд Компани орлогыг тухайн сарын 25-ны дотор шилжүүлэх эсвэл Нийлүүлэгчийн хүсэлтээр шилжүүлнэ. Хэрэв сарын орлого 50,000 /тавин мянга/ төгрөгийн дүнд хүрээгүй тохиолдолд түүнийг дараа сарын төлбөртэй хамтатган шилжүүлгийн шимтгэлийг хасаж шилжүүлнэ;

Гэрээний ерөнхий нөхцөл

Компанийн эрх, үүрэг
1.1 Энэ Гэрээний дагуу Компани дараах эрх эдэлнэ;
1.1.1 Гэрээгээр хүлээсэн үүргийн биелэлтийг Нийлүүлэгчээс шаардах;
1.1.2 Нийлүүлэгчийн зүгээс цахим хэлбэрээр өгсөн Контентийн хуудас дутуу, үг үсэг гаргацгүй байх гэх мэт доголдол Контентод байгаа бол Нийлүүлэгчид шаардлага тавьж засуулах, холбогдох арга хэмжээг авах;
1.1.3 Урамшуулал болон бусад үйлчилгээний идэвхжүүлэлттэй холбогдуулан Нийлүүлэгчтэй харилцан тохиролцсоны үндсэн дээр Контентийн үнийг бууруулах мөн үнэгүй болгох санал гаргах;
1.1.4 Гэрээнд заасан хэмжээгээр өөрт ногдох орлогын хувийг авах;
1.1.5 Нэг төрлийн контентийг Нийлүүлэгчээс өөр нэрээр дахин оруулах эрсдэлээс хамгаалж контентийн нэр, бүтээсэн хугацаа, зохиогч зэрэг талбаруудыг ESAN цахим санд орохоос өмнө шалгана. Зөрчил илэрсэн тохиолдолд Нийлүүлэгчид албан ёсоор мэдэгдэж үүссэн асуудал шийдвэрлэгдэх хүртэл Нийлүүлэгчийн Контентийг Esan цахим санд байршуулахгүй;
1.1.6 Нийлүүлэгчийн Контентийг аудио хэлбэрт шилжүүлэн хөрвүүлэх;
1.1.7 Нийлүүлэгчийн нийлүүлэх бүтээл нь оюуны өмчийн зөрчилтэй, ёс зүйн хэм хэмжээг зөрчсөн, улсын нууцад хамаарах мэдээллийг агуулсан, эсвэл Esan цахим сангийн бодлоготой зөрчилдөхөөр бол Нийлүүлэгчийн Контентийг Esan цахим санд байршуулах, нийтэд түгээхээс татгалзах;
1.2 Энэ Гэрээний дагуу Компани дараах үүрэг хүлээнэ:
1.2.1 Нийлүүлэгчээс бүтээлийг цахим ба хэвлэмэл хэлбэрээр хүлээн авч, стандартын шаардлага хангасан тоног төхөөрөмж, техник хэрэгсэл ашиглан бүтээлүүдийг түргэн шуурхай цахимжуулах, олон нийтэд хүргэх;
1.2.2 Энэ Гэрээ байгуулагдаж, Нийлүүлэгчийн контент Esan цахим санд байршмагц Esan хэрэглэгчийн эрхийг нээж өгөх;
1.2.3 Талууд харилцан тохиролцсон бол Нийлүүлэгчийн нийлүүлж байгаа зарим контентийг үнэ төлбөргүй цахимжуулж, хуучны бүтээлийн цахим хувилбарыг Нийлүүлэгч талд олгох;
1.2.4 Контентийг нийтэд түгээхтэй холбоотой төлбөр тооцоог хэрэглэгчээс нэхэмжлэх, төлбөрийг барагдуулах зэрэг хэрэглэгчтэй холбоотой тооцоог бүрэн хариуцаж ажиллах;
1.2.5 Нийлүүлэгчийн өгсөн контентийн эх хувь /бүтээл/-ийг бусдад шилжүүлэхгүй, гэрээнд зааснаас бусад хэлбэрээр ашиглахгүй байх;
1.2.6 Esan-цахим сангийн системийн аюулгүй байдлыг хариуцна;
1.2.7 Ирээдүйд хийгдэх цахим шинэчлэлт, сайжруулалт, түүнийг дагасан зах зээлийн ханш бүхий үнэ, төлбөрт орсон өөрчлөлтийг цаг тухай бүр бүртгэлтэй цахим и-мэйл хаяг руу илгээнэ;
Нийлүүлэгчийн эрх, үүрэг
2.1. Нийлүүлэгч энэ Гэрээний дагуу дараах эрхтэй:
2.1.1 Esan Цахим санд байрлах контентод хяналт тавьж Esan цахим сангийн үйлчилгээтэй холбоотой санал, зөвлөмж өгөх, хүсэлт тавих;
2.1.2 Гэрээнд заасан хэмжээгээр өөрт ногдох орлогыг авах;
2.1.3 Гэрээгээр хүлээсэн үүргээ биелүүлэхийг Компаниас шаардах;
2.1.4 Esan цахим санд байршуулсан контентийн худалдан авалтын тоон мэдээ, гишүүнчлэлийн болон бусад хэлбэрээр үзсэн, уншсан хэрэглэгчийн тоо, олсон орлого зэрэг мэдээллүүд (Нийлүүлэгчийн Dashboard)-ийг Esan цахим санд үүсгэсэн хэрэглэгчийн эрхээр нэвтрэн хүссэн үедээ танилцах, хяналт тавих;
2.1.5 Ирээдүйд бий болох үнэ цэнэ, хэрэглэгчдийн эрэлтээс хамаарч контентийн үнэд өөрчлөлт оруулах эрхтэй бөгөөд компанид урьдчилан мэдэгдэж, харилцан тохиролцоно;
2.2. Нийлүүлэгчийн үүрэг:
2.2.1 Нийлүүлэгч нь улсын нууцын зэрэглэлд хамаарах материалууд, түүх соёлын дурсгалт зүйлд хамаарах материал, хэрэглэгчийн ёс зүйд сөргөөр нөлөөлөх, Esan цахим сангийн бодлоготой зөрчилдөх, хүчирхийлэл, садар самууныг сурталчилсан контент нийлүүлэхгүй байх;
2.2.2 Нийлүүлэгч нь өөрийн өмчлөл, эзэмшилд эсвэл эрх шилжүүлэх гэрээний дагуу шилжүүлэн авсан оюуны бүтээлүүд буюу контентуудыг Еsan цахим санд байршуулах ба мэдлэг, мэдээллийг олон нийтэд түгээж үр ашигтай ашиглагдах хандлагыг баримтлана;
2.2.3 Нийлүүлэгчийн контент нь Монгол хэл дээр хийгдсэн байна. Хэрэв гадаад хэл дээрх контент нийлүүлэхийг хүсвэл тайлбар хэсгийг Монгол орчуулгыг хамтад нь оруулах;
2.2.4 Нийлүүлэгч нь Компанийн тухай элдэв гүтгэлэгт мэдээлэл түгээхгүй байх;
2.2.5 Нийлүүлэгч нь Esan хэрэглэгчийн нэвтрэх нэр, нууц үг зэрэг мэдээллийн нууцлалыг хадгалах, аливаа этгээдэд задруулахгүй байх;
2.2.6 Нийлүүлж буй контенттой холбоотой оюуны өмчийн болон зохиогчийн эрх, түүнд хамаарах эрх, зохиогчийн эдийн бус баялгийн эрх, тэдгээртэй холбогдон гарах аливаа маргаан, зөрчилтэй асуудлыг бие даан шийдвэрлэх;
2.2.7 Доголдолтой контент нийлүүлсэн тохиолдолд энэ Гэрээнд нийцүүлэн доголдлыг арилгах;
2.2.8 Нийлүүлэгч Гэрээний хугацаанд контентыг гуравдагч этгээдэд интернэт орчинд Esan цахим санд нийлүүлснээс хямд үнээр нийлүүлэхгүй байх бөгөөд гуравдагч этгээдийн платформын системийн аюулгүй байдал, бүтээл алдагдах зэрэг эрсдлийг Нийлүүлэгч хариуцах;
2.2.9 Нийлүүлэгч нь ирээдүйд хийгдэх системийн сайжруулалт, шинэчилэлт түүнийг дагасан үнэ төлбөрт орох өөрчлөлтийг хүлээн зөвшөөрнө;
Гэрээ цуцлах үндэслэл болон талуудын хариуцлага
3.1 Аль нэг тал нь энэхүү Гэрээгээр хүлээсэн үүргээ биелүүлээгүйн улмаас нөгөө талдаа хохирол учруулсан бол учруулсан бодит хохирлоо буруутай тал нь нөхөн төлнө;
3.2 Нийлүүлэгч нь Компанийн эсрэг гуравдагч этгээдийн гаргасан аливаа зохиогчийн эрхийн зөрчилтэй холбоотой нэхэмжлэл, хариуцлага, шаардлага, хохирлоос Компанийг бүрэн чөлөөлж учруулсан хохирлыг бүрэн хариуцна;
3.3 Esan цахим сан болон бусад платформ дээр давхар байршсан контент Компаниас шалтгаалахгүй хүчин зүйлийн улмаас алдагдсан тохиолдолд Компани хариуцлага хүлээхгүй;
3.4 Гэрээний аль нэг тал гэрээний үүргээ зөрчсөнөөс нөгөө талдаа ноцтой хохирол учруулсан бол гэрээг цуцлах үндэслэл болно;
3.5 Талуудын эрх бүхий төлөөлөгчид өөрчлөгдсөн эсэхээс үл хамааран, энэхүү гэрээнд заасан хугацаанд гэрээ хүчин төгөлдөр үйлчилнэ;
3.6 Талууд харилцан тохиролцож гэрээг цуцалж болох бөгөөд Компани гэрээ цуцлах тухай саналаа 90-ээс доошгүй хоногийн өмнө Нийлүүлэгчид албан ёсоор бичгээр мэдэгдээгүй бол гэрээ анх байгуулсан хугацаагаар сунгагдана;
3.7 Компани гэрээгээр хүлээсэн үүргээ зөрчөөгүй тохиолдолд Нийлүүлэгч аливаа өөр ашиг сонирхлын улмаас гэрээг хугацаанаас нь өмнө цуцлах эрхгүй;
4.Бусад 4.1 Талуудын аль нэг нь нөгөө талын зөвшөөрөлгүйгээр гэрээний эрх, үүргээ Гуравдагч этгээдэд шилжүүлэхийг хориглоно;
4.2 Энэхүү Гэрээ болон хавсралтад нэмэлт өөрчлөлт оруулах тохиолдолд аль нэг тал хүсэлт гаргах асуудлыг зөвхөн гэрээ байгуулагч талууд харилцан тохиролцож шийдвэрлэх ба аль нэг тал нөгөө талдаа бичгээр мэдэгдэнэ;
4.3 Аль нэг талын бичгээр мэдэгдсэн асуудлыг хүлээн авснаас хойш ажлын 5 өдөрт /тэр өдөр нь амралтын өдөр болон баяр, ёслолын өдөр таарвал дараагийн ажлын өдөр/ багтаан талууд харилцан тохиролцож шийдвэрлэнэ;
4.4 Энэхүү гэрээнд орсон нэмэлт өөрчлөлтүүдэд талуудын эрх бүхий төлөөлөгчид цахим эсхүл бичгээр гарын үсэг зурж, тамга дарж гэрээнд хавсаргаснаар гэрээтэй адил хүчинтэй хугацаанд үйлчилнэ;
4.5 Энэхүү гэрээгээр зохицуулаагүй аливаа харилцааг Монгол Улсад хүчин төгөлдөр үйлчилж байгаа хууль тогтоомжийн дагуу зохицуулна;
4.6 Энэхүү гэрээтэй холбогдон гарах аливаа санал зөрөлдөөн, маргааныг талууд харилцан зөвшилцөх журмаар шийдвэрлэнэ. Харилцан зөвшилцөлд хүрээгүй тохиолдолд уг асуудлыг Монгол Улсын шүүхэд хандан шийдвэрлүүлнэ;
4.7 Гэрээг Монгол хэл дээр 2 хувь үйлдэж, тал тус бүр нэг нэг хувийг хадгална;